Yaadein...

Raah Dekhi Thi Is Din Ki Kabse,
Aage Ke Sapne Sajaae The Na Jane Kab Se...
Bade Utavle The Yahaan Se Jaane Ko,
Zindagi Ka Agla Padaav Paane Ko...

Par Na Jane Kyun Dil Mein Aaj Kuch Aur Aata Hai,
Waqt Ko Rokne Ka Jee Chaahta Hai...
Jin Baton Ko Lekar Rote The Aaj Un Par Hansi Aati Hai,
Na Jane Kyun Aaj Un Palon Ki Bahut Yaad Aati Hai...

Kaha Karta The, Badi Mushkil Se Teen Saal Seh Gaya,
Par Aaj Kyun Lagta Hai Ki Kuch Peeche Reh Gaya...
Na Bhoolne Wali Kuch Yaadein Reh Gayi,
Yaadein Jo Ab Jeene Ka Sahara Ban Gayi...

Meri Taang Ab Kaun Kheencha Karega,
Sirf Mera Sar Khane Kaun Mera Peecha Karega...
Jahan 500 Ka Hisab Nahin Wahan 5 Rupay Ke Liye Kaun Ladega,
Kaun Raat Bhar Mere Saath Jaag Kar Padhega...

Kaun Meri Byk Mujhse Pooche Bina Le Jaega,
Kaun Mere Naye Naye Naam Banaega...
Mein Ab Bina Matlab Kis Se Ladunga,
Bina Topic Ke Kisse Faaltu Baat Karoonga...

Kaun Fail Hone Par Dilasa Dilayega,
Kaun Galti Se Zada Number Aane Par Gaaliaan Sunaega...
Canteen Mein Chai Kis Ke Saath Piyunga,
Wo Haseen Pal Ab Kis Ke Saath Jiyunga...

Aise Dost Kahaan Milenge Jo Khai Mein Bhi Dhakka De Aayein,
Par Fir Tumhein Bachane Khud Bhi Kood Jayein...
Mere Gaano Se Pareshan Kaun Hoga,
Aur Mujhe Kisi Ladki Se Baat Karte Dekh Hairan Kaun Hoga...

Kaun Kahega Saale Tere Joke Pe Hansi Nahin Aai,
Kaun Peeche Se Bula Ke Kahega, "Ramu, Aage Dekh Bhai!"...
Movies Main Kiske Saath Dekhunga,
Kis Ke Saath Boring Lectures Jhelunga...

Achanak Bina Matlab Ke Kisi Ko Bhi Dekh Kar Hasna,
Lecture Mein Hamesha Der Se Ghusna...
Doston Ke Liye Professor Se Ladna,
Munni Aur Sheela Ke Liye Dil-o-Jaan Se Marna...

Raat Ko 10 Baje Dhani Ram Ke Paas Kaun Jaega,
Tez Byk Chalane Ki Shart Kaun Lagaega...
Kaun Mujhe Meri Kabiliyat Par Bharosa Dilaega,
Aur Zyada Hawa Mein Udne Par Zameen Pe Laege...

Bina Dare Sachi Rae Dene Ki Himmat Kaun Kar Paega...
Meri Khushi Mein Sach Mein Khushi Kaun Manaega...
Kaun Mere Gham Mein Mujh Se Jyada Aansu Bahaaega...
KEH DO DOSTON YE WAQT DOBAARA KAB AAEGA!!!

-Ashi....